Ervin Hajdaraga është i riu nga Tirana me profesion psikolog në QSUT, por me një pasion të madh për sipërmarrjen. Sipërmarrja që ai ka zgjedhur të investojë nuk është e zakontë për vendin tonë. Vetëm pak herë mund të kemi dëgjuar për një fermë kërmijsh. Tashmë kjo fermë është bërë pjesë e pandshme e jetës së tij. Ervinin e gjen aty në çdo kohë duke u kujdesur për krijesat që i kosideron pjesë të pandashme të jetës. Por si lindi ideja e kësaj sipërmarrje?
Ervini tregon për BusinessMag.al se ideja për të krijuar një biznes e ngacmonte prej kohësh, por krijimi i një ferme për kultivimin e kërmijve ishte e rastësishme. “Po kthehesha nga peshkimi me një mikun tim dhe po bisedonim rreth bujqësisë. Fakti që po shinim kaq shumë toka të pa kultivuara na shtyu të mendonim të merreshim me diçka që të kishte lidhje më bujqësinë dhe si opsion të mundshëm menduam kultivimin dhe rritjen e kërmijve,” – na rrëfen ai.
Ferma“Elix Snail” gjendet në Durrës, në zonën e Sukthit, pranë stacionit të trenit. Ervini nuk është i vetëm në këtë rrugëtim. Ai ka edhe një orak, për të cilin shprehet se, e ka ndihmuar shumë në rrugëtimin e tij, duke i besuar eksportin, një nga punët më të rëndësishme.
Ai shprehet se gjatë kohës kur punëtorët po merreshin me ndërtimin e fermës, çuditej nga tërë proceset e ndërtimit. Kishte jetuar në qytet dhe nuk kishte pasur mundësinë të njihej me procese të tilla. Edhe gjërat më minimale të punimit të tokës i dukeshin të jashtëzakonshme. “Në bashkëpunim me Institutin e Kultivimit të Kërmijve në Cherasco, kemi nxjerrë në treg kërmijtë Helix Aspersa Muller. Ato vlerësohen maksimalisht si nga kozmetika edhe gastronomia botërore.
Kërmijtë përmbajnë proteina, nivel të ulët yndyre dhe omega 3. Ndihmojnë në problemet e artritit, trompozës dhe kolesterolit. Krahas faktit që janë një delikatesë shumë e shijshme”,- shprehet ai.
Tashmë, prej tre vitesh ai jeton mes dy filozofive të ndryshme. Nga ferma prodhohen rreth 8 ton kërmij në sezon ku çmimi për kg shkon nga 4-5 euro. Në vitin 2018 nga ferma “Elix Snail” u prodhuan 90 ton kërmij. Tashmë kjo fermë ekporton 54% të prodhimit në Bosnje. Eksporti është i përhapur në Greqi, Serbi, Bullgari dhe së fundmi edhe në Itali. Kërmijtë e fermës Elix Snail gjithashtu tregtohen e gatuhen edhe në Shqipëri në disa nga restorantet më të mira të vendit si: Millenium Gourmet, The Home Social Club, Amor Restorant dhe Umami.
Që një kërmill të jetë i gatshëm për t’u konsumuar duhet të jetë maturuar 14- 16 muaj. Kërkesa për kërmijtë, shprehet ai, është rritur edhe nga qendrat esetike apo nga fabrikat që prodhojnë produkte kozmetike.
“Ajo çka më motivon më shumë është fakti që klientët dhe miqtë me komplimentojnë herë pas here për punën që bëj. Shpresoj që pas shumë vitesh kërmilli i fermës time të jetë një nga prodhimet më të mira në Europë”.
I pyetur nga BusinessMag.al se pse zgjodhi pikërisht kërmijtë për të ndërtuar një sipërmarrje ai shprehet se klima e vendit e favorizon rritjen e një produkti të tillë. Rritja e kërmijve konsiston me ushqyerjen e tyre me lakër, panxhar, tërfil, karrota, kungull dhe luledielli. Por, si çdo biznes tjetër edhe biznesi i kërmijve ka risqet e veta. Ato rrezikohen më së shumti nga temperaturat nën 0 gradë. Kjo temperaturë është e papërballueshmë për organizmin e tyre.
Një nga llojet e kërmijve që kultivohen në “Elix Snail” është lloji i kërmilit Helix Aspersa Muller” ose i quajtur ndryshe edhe si kërmilli mesdhetar. Ka një guaskë ngjyrë kafe të hapur të mbuluar nga vija të bardha, kurse pesha e tij shkon deri në 12 gramë.
Në maternitet ndodh riprodhimi i kërmijve mëma dhe pas 45 ditësh lindin kërmijtë e rinj. Të vegjlit ushqehen me bimësinë që ndodhet në maternitet dhe disa ditë më vonë u jepet edhe ushqim shtesë, si: kungull, bostan e luledielli, të cilat janë mbjellë në parcelat përballë disa ditë pas hedhjes së rasatit në maternitet.
Kjo është zona suplementare, e vetmja e pa rrethuar dhe me disa impiante vaditëse në të. Gjatë qëndrimit të kërmijve në maternitet, toka ujitet çdo ditë për 30 minuta pas perëndimit të diellit në mënyrë që të këtë lagështi të mjaftueshme për ta. (businessmagazine)