Konservat kanë lindur si pasojë e nevojës së njeriut për të pasur produkte ushqimore në kohë të ndryshme të vitit dhe të ruhen për një kohë më të gjatë.Konservat e frutave dhe perimeve lëndë bazë kanë vet frutat dhe perimet, të cilat pasi trajtohen me procese të ndryshme dhe me substanca e shtesa ushqimore, formojnë produktet me karakteristika të veçanta që përbëjnë konservat.
Lëndët e para ndihmëse, që përdoren në teknologjinë e përpunimit të frutave dhe perimeve, luajnë një rol të madh në përcaktimin e karakteristikave të tyre kimike dhe fizike, vlerat ushqimore dhe vetitë organo-shqisore.
Operacionet përgatitore kryesore për prodhimin e konservave të frutave dhe perimeve
Para se të filloj trajtimi i frutave dhe perimeve për përfitimin e konservave, ato i’u nënshtrohen disa operacioneve përgatitore shumë të rëndësishme në cilësinë e produkteve përfundimtare të prodhuara.
Së pari bëhet vjelja e cila duhet të jetë në një stad të caktuar pjekjeje, as shumë e pjekur dhe as jo e pjekur mirë. Gjithashtu vjelja duhet bërë me kujdes në mënyrë që të mos kemi dëmtim të produkteve bimore, pasi kemi zhvillimin e proceseve të padëshirueshme e që ndikojnë në cilësinë e tyre.
Pas vjeljes, frutat dhe perimet i nënshtrohen seleksionimit që bazohet në disa karakteristika sipas llojit të përpunimit që do të pësojë.
Më pas ato pastrohen nga papastërtitë e mbartura nga vjelja, transporti etj. Këto papastërti mund të jenë dhera, gurë, etj. Frutat dhe perimet në varësi edhe të produkteve i nënshtrohen procesit të larjes i cili kryhet me ujë, i cili duhet të jetë domosdoshmërisht ujë i pijshëm. Pas këtyre proceseve përgatitore, frutat dhe perimet janë gati për të i’u nënshtruar përpunimit për konservim.
Reçel dredhëze
5 kg dredhëz,
2.5 kg sheqer,
500 ml ujë,
30 g limontoz
Dredhëzat e një madhësie lahen dhe kullohen mirë. Limontozi tretet në ujë dhe vendosen dredhëzat në lëngun e tharbët. Në tenxhere ku do të zihet reçeli , radhiten një rend dredhëza, një rend sheqer, prapë dredhëza dhe rendi i fundit duhet të jetë i mbuluar me sheqer . Të nesërmen zihen në zjarr të fuqishëm.
Gjatë zierjes nuk largohet shkuma, prandaj ena ku zihet duhet të jetë e madhe në mënyrë që shkuma mos të derdhet gjatë gufimit, por kohë pas kohe rritet dhe ulet temperatura e zjarrit.Reçeli zihet 30 minuta, pastaj largohet nga zjarri mbulohet me pecetë të lagur. Pas 20 minutave pasi dredhëza ta lëshon lëngun, prapë kthehet ena në zjarr. Sa të marrin 2-3 valë dhe të largohet e tërë shkuma, dredhëzat largohen nga zjarri.
Reçeli i përgatitur në këtë mënyrë derdhet në kavanoz të pastër. Bëhet pasterizimi i kavanozave në 75°C, 30 min që nga momenti i vlimit.