7 aplikime për rritje të tarifave të ujit nga ana e shoqërive të ujësjellës-kanalizimeve janë aktualisht në proces shqyrtimi nga ana e Entit Rregullator të Ujit.
Sipas të dhënave zyrtare nga ky dikaster disa nga qytetet që kanë kërkuar ndryshim tarife janë Vlora, Himara, Berat-Kuçova dhe Lushnja.
Gjithashtu, aplikime janë bërë edhe nga shoqëritë e ujësjellës-kanalizimeve të Krujës, Roskovecit dhe Vorës. Gjatë këtij viti Enti Rregullator I Ujit ka miratuar rritje çmimesh për abonentë familjarë dhe biznese në disa qytete, sikurse është Gjirokastra, Poliçani, Tropoja apo Delvina.
Megjithatë, gjatë shqyrtimit të raportit vjetor, rritja e tarifave të ujit dhe ujësjellës kanalizimeve u kthye në debat mes kreut të Komisionit parlamentar të Veprimtarive Prodhuese, Niko Peleshi dhe kreut të ERRU-së, Ndriçm Shani.
Sipas këtij të fundit, aktualisht ka hapësira që lejojnë rritjen e tarifave, por Peleshi kërkoi që kompanitë të mirë menaxhohen për të përmirësuar situatën financiare, duke e parë si hallkë të fundit rritjen e tarifës për të rritur të ardhurat.
Sektori i ujit është në reformim, por raporti vjetori i Entit Rregullator për vitin 2018, vlerësoi se reforma në sektor nuk dha rezultate.
Sipas Entit, mbulimi i furnizimin me ujë u përkeqësua me 0.09% gjatë vitit 2018, ndërkohë që mbulimi me kanalizime pësoi përmirësim me 1.4% në krahasim me një vit më parë.
APLIKIME PËR RRITJEN E ÇMIMIT TË UJIT
Ujësjellës –Kanalizime Kuçovë-Berat
Ujësjellës –Kanalizime Himarë
Ujësjellës –Kanalizime Lushnje
Ujësjellës –Kanalizime Vlorë
Ujësjellës –Kanalizime Roskovec
Ujësjellës –Kanalizime Krujë
Ujësjellës –Kanalizime Vorë