Në të gjithë Europën, deti po shkel në gati një të pestën e vijës bregdetare, vlerëson Bashkimi Europian, duke zaptuar tokën, duke hequr rërën nga plazhet dhe duke sjellë dhimbje ekologjike, ekonomike dhe njerëzore.
Rreth 1.300 kilometra tokë në Danimarkë janë zhvendosur nga vija bregdetare, ndërsa në Portugali, autoritetet mund të shembin ndërtesat përgjatë 122 kilometrave të një bregdeti që po gërryhet. Dhe gjithashtu fshati Fairbourne në Uellsin verior dhe qyteti francez i pushimeve Lacanau po konsideron zhvendosjen e një pjese të komunitetit nga zona bregdetare.
Bota mund të humbasë gati gjysmën e plazheve të saj me rërë deri në fund të shekullit, nëse ndryshimet klimatike nuk mbahen nën kontroll, sipas një studimi të Nature Climate Change. Studimi supozon një rritje prej 4 gradë celsius në temperaturat nga nivelet paraindustriale deri në vitin 2100 që do të rritnin nivelin e detit, duke çuar në erozion dhe rritje të përmbytjeve bregdetare.
Ndërsa erozioni bregdetar është një fenomen global, Europa është veçanërisht e ekspozuar, me raportin më të lartë të vijës bregdetare për sipërfaqen totale të çdo kontinenti.
Vlera e pasurive brenda 500 metrave të vijës bregdetare të BE-së u vlerësua në 1 trilion euro në një studim të vitit 2009 nga Komisioni Europian. Dëmtimet nga përmbytja bregdetare dhe erozioni mund të arrijë në 11 miliardë euro në vit në 30 vitet e ardhshme dhe 25 miliardë euro deri në vitin 2080, thotë një raport i financuar nga BE.
Me nivelin e detit që rritet 4 milimetra në vit përgjatë disa pjesëve të kontinentit, ndjeshmëria po rritet. Tashmë, 42 nga 49 vendet e Trashëgimisë Botërore të Unesco-s në Mesdhe përfshirë qytetin e lashtë italian të Sirakuzës dhe kryeqytetin maltez Valletta janë në rrezik.
Studiuesit kanë lidhur erozionin e përshpejtuar në dekadat e fundit me aktivitetin njerëzor dhe nëse nuk nisin masat paraprake humbja e zonave bregdetare dhe fundosja e Europës do të vijë sipas parashikimeve të bëra.
https://www.dailymail.co.uk/news/article-5362637/Is-Britains-endangered-road.html?ito=embedded