Forumi Global për Ushqim dhe Bujqësi, i mbajtur ne 19 janar në Berlin të Gjermanisë është një forum, i cili mbahet në kuadër të Panairit ndërkombëtar “International Green Week”. Në këtë forum, kancelarja gjermane, Angela Merkel, ka pritur në takim ministrat e bujqësisë nga vende të ndryshme të botës, takim në të cilin ka marrë pjesë edhe ministri Rikalo. Gjatë fjalimit të saj, kancelarja Merkel ka folur për rëndësisë e teknologjisë digjitale për të ardhmen e bujqësisë.
Në këtë forum merrnin pjesë Ministri i Bujqësisë, Pylltarisë dhe Zhvillimit Rural, Nenad Rikalo, si edhe Sekretari i Përgjithshëm i ministrisë, Kapllan Halimi.
Delegacioni i MBPZhR-se merrte pjesë me ftesë të Ministres së Ushqimit dhe Bujqësisë të Gjermanisë, Julia Klockner.
Ndërkohë, ministri i Kosoves Rikalo, ka zhvilluar takime me homologët e tij nga vendet pjesëmarrëse në këtë forum, por edhe me përfaqësues të institucioneve dhe organizatave të ndryshme të bujqësisë nga Gjermania dhe vende të tjera.
“MBPZHR-ja edhe gjatë këtij viti do të vazhdojë mbështetjen e zhvillimit të bujqësisë në vend, me qëllim të rritjes së prodhimit bujqësor dhe zhvillimit të bizneseve në këtë fushë që do të shtojnë vende të reja të punës por edhe do të rrisin cilësinë dhe sasinë e produkteve vendore. Po ashtu, jemi të fokusuar dhe të gatshëm për vazhdimin e bashkëpunimit rajonal dhe ndërkombëtar në fushën e bujqësisë”, ka thënë ministri Rikalo, gjatë takimit me homologët e tij të vendeve të ndryshme të botës.
Krahas këtyre takimeve, ministri Rikalo dhe delegacioni qe ai kryeson mori pjesë edhe në hapjen e ngjarjes më të rëndësishme për bujqësinë dhe ambientin, “Java e Gjelbër Ndërkombëtare”, që po ashtu u mbajt në Berlin, në të cilin u prezantuan dhjetëra shtete nga e mbarë bota.
Agronews.al