Reklame:

Nis viti i ri shkollor me protokollet antiCovid, rreth 480 mije nxenes ulen ne bankat e shkollave

Në të gjitha institucionet arsimore në vend diten e sotme ka nisur viti i ri shkollor 2020-2021 me masa të forta antiCOVID. Janë rreth 480 mijë nxënës që ulen në bankat e shkollës pas një mungese të gjatë për shkak të pezullimit të mësimit nga situata e pandemisë.

Për shkak të situatës nga pandemia e koronavirusit, në shkolla do të ndiqen një protokoll i veçantë sigurie, në mënyrë të tillë që të minimizohet përhapja e COVID-19. Ndryshe nga vitet e tjera, ky vit shkollor do të zhvillohet për disa shkolla me 2, 3 apo dhe 4 turne, në mënyrë të tillë që fluksi i nxënësve të jetë më i vogël në klasa, pasi nëpër banka lejohet vetëm nga një fëmijë dhe të pajisur detyrimisht me maska.

Fëmijët dhe i gjithe stafi pedagogjik kanë qenë të pajisur me maska dhe dezinfektantë, ndërsa kanë ruajtur distancën sociale pa mundur të përqafohen me shokët dhe mësuesit.

Rreth 30 mijë mësues jane angazhuar për vitin e ri shkollor, ndërkohë që mësimi nuk do të nisë në të gjitha shkollat, pasi disa prej tyre janë në fazë rikonstruktimi për shkak të dëmtimeve nga tërmeti.

Një ditë para nisjes së vitit të ri shkollor e rihapjes së klasave, Ministrja e Arsimit, Besa Shahini rikujtoi rëndësinë e masave anti-COVID. Shahini theksoi se “nxënësit i pret një normalitet i ri”. Që të ruhet shëndeti i të gjithëve e të sigurohet proces i mbarë shkollor, ministrja nënvizoi se duhet mbajtur maska, si dhe të respektohen distanca e të tjera rregulla. Aktualisht, 94 shkolla nuk do të hapin dyert sot por më vonë. Viti i ri shkollor nis sot dhe në Kosovë ku janë shpërndarë 500 mijë maska për nxënësit e mësuesit. Mbajtja e tyre është e detyrueshme, ashtu si respektimi i distancës e higjiena.