Reklame:

Dhoma Amerikane e Tregtisë kundër Aeroportit të Vlorës, Jaço: Të pezullohen punimet! Nëse s’ndodh kostot do jenë të mëdha

TIRANË– Presidenti i Dhomës Amerikane të Tregtisë, Enio Jaço ka reaguar pas kërkesës së Konventës së Bernës për pezullimin e Aeroportit të Vlorës. Me anë të një postimi të bërë në rrjetin e tij Facebook, Jaço thekson se ky do jetë rasti që do vërë në test Shqipërinë në respektimin e ligjeve kombëtare dhe ndërkombëtare. Ai ka evidentuar 4 konkluzione të Konventës së Bernës për punimet në aeroport duke nisur nga mungesa e respektimit të ligjeve kombëtare e deri përputhshmëria me ligjet e BE-së. Jaço shton në fund se tani është koha kryesore jo vetëm për t’iu përmbajtur legjislacionit vendas, por edhe për t’u harmonizuar me konventat dhe ligjet ndërkombëtare ku Shqipëria është nënshkruese.

Jaço nënvizion se nëse palët nuk e kuptojnë këtë, kostot, barra dhe vonesat e rrugës drejt BE-së do të jenë shumë të mëdha.

SHKRIMI I PLOTË:

4 Konkluzione nga Kërkesa e Konventës së Bernës për të Pezulluar Ndërtimet në Aeroportin e Vlorës

1) Konventa e Bernës, një organizatë e Këshillit të Europës në Strasburg, konstatoi se vendimet për ndërtimin e aeroportit të Vlorës janë “në mungesë të dukshme të respektimit të ligjeve kombëtare dhe ndërkombëtare”. Ky nuk është lajm i mirë për shtetin e të drejtës në Shqipëri dhe progresin me hapjen e negociatave me BE. E drejta e ligjit është një nga prioritetet që BE i ka vendosur Shqipërisë përmes progres raportit.

2) Vendimi është një fitore lobimi e forcave ambientaliste të shoqërise civile në Shqipëri. Nuk është hera e parë që organizatat e shoqërisë civile kanë lobuar në organizmat e Këshillit të Europës. Por EcoAlbania dhe PPNEA kanë meritë të veçantë në përgatitjen e një dosje teknikisht serioze në kanalet europiane të së drejtës.

3) Tani që BE ka hapur procesin e negociatave, është e pritshme që institucionet Europiane të jenë gjithmonë e më të përfshira në proceset e brendshme në Shqipëri – veçanërisht funksionimin e drejtësisë. Prandaj është koha kryesore jo vetëm për t’iu përmbajtur legjislacionit vendas, por edhe për t’u harmonizuar me konventat dhe ligjet ndërkombëtare ku Shqipëria është nënshkruese. Kjo duhet të përfshijë Qeverinë, institucionet e administratës publike, por edhe shoqërinë civile dhe sektorin privat. Nëse palët nuk e kuptojnë këtë, kostot, barra dhe vonesat e rrugës drejt BE-së do të jenë shumë të mëdha.

4) Si do menaxhohet situata në të ardhmen e afert – do ketë një kompromis me Konventën apo do të shpërfillet? Mjedisi është një çështje thelbësore për BE-në. Kjo do të përcaktojë rrugën, marrëdhënien dhe qasjen që do të vendosin institucionet shqiptare me BE-në

Komiteti i Përhershëm i Konventës së Bernës u kërkoi autoriteteve shqiptare pezullimin e punimeve për ndërtimin e Aeroportit të Vlorës dhe ndërmarrjen e një programi gjithëpërfshirës të monitorimit të jetës së egër dhe rishikimin e të dhënave të Raportit të Vlerësimit të Ndikimit në Mjedis për zonën ku po ndërtohet aeroporti. Sipas dokumenteve të miratuara në mbledhjen vjetore të Komitetit të mbledhur në Strazburg në takimin vjetor nga 28 nëntori deri në 2dhjetor “ kërkesa për pezullimin e punimeve për ndërtimin e Aeroportit të Vlorës vjen për shkak të mungesës së dukshme të respektimit të ligjeve kombëtare dhe ndërkombëtare”.

dosja.al